حاجة حلوة جدا إن الواحد يتحب ويحس إن فيه حد مهتم بيه أوي ده شيء جميل جدا, وكمان فيه حاجة أجمل وهي الواحد لما يحب بأة دى حاجة أجمل وإحساس ما حصلش.
لما يجي حد فجأة كده يقلب كيانك يحسسك بجد انك بتحب , تحس إن فيه زلزال جواك تحس إن القلب اللى جواك ده اللى أنت فاكره مسئول عن ضخ الدم والحياة بس بأة ليه وظيفة تانية خالص بيدق عشان انت بقيت إذ فجأة كدهون بتحب , بتقولوا إيه يا ولاد؟ انت بتحب, بتعمل إيه ؟ بتحب , إييييييييييييييه؟ بتحب.
تحس بأة فجأة انك لما تشوف الحد اللى انت بتحبه ده بجد يا اخواننا ومش أى كلام انك خلاص ممكن يغمن عليك يغمن عليك على رأى عادل إمام , وبعدين تلتقي حد فعلاً صحي جواك أحاسيسك ومش أى أحاسيس دى أجمل أحاسيس , خلاك تغير, أيوة بالظبط تغير , تبقى عايز تعمل عليه حصار ومش عايز تخليه يكلم حد غيرك ولا يشوف حد غيرك, تبقي عايز تحبسه في قلعة ذهبية عشان مايشوفش ولا يكلم حد تاني غيرك.
غيرة بأة و الغيرة تعمل أكتر من كده على فكرة بيقولوا إن (الغيرة فقاقيع الحب) يعني اللى مش بيغير يبقى مش بيحب .
وبعدين تحس أن قلبك بأة جمرة نار خلاص مش قادر مش عايز حد غيرك يكلمه ولا يشوفه,وبعدين تلتقي نفسك أحلي في كل حاجة في الأحاسيس اللى جواك اللى كلها فجأة بتطلع بسبب حبوبك ده وبتطلع لحبوبك ده وانك عايز تعمل أحلي حاجة وتقوله أحلي كلام.
وممكن تفضل معاه فترة طويلة جدا وأول ما تمشي وتسيبة بجد تحس إنه واحشك وانك مش شوفته من فترة طويلة وانك عايز ترجعله تاني , وبعدين تلتقي نفسك بتدور عليه وانت لسة سايبه حالاً , فعلاً بتدور عليه , بس المشكلة إنه خلاص مشي , وتفضل انت بأة حاسس إن فيه حاجة ناقصاك ضايعة منك وتفضل عيونك وقلبك يدوروا على حبوبك , والمشكلة إنك مش هتعرف تشوفه دلوقتي , لأنه ببساطة مشي , وتفضل أنت بأة حيران هتتجنن عشان تشوفه , يعني من كتر ما انت عايز تشوفه (تتمني يطلعلك الجني اللى كان في فيلم لص بغداد عشن يخليك تشوفه ده لو ينفع طبعاً).
وبعدين تلاقي الحد ده بجد أجمل وأحلي وألطف حد في العالم كله , وإن دمه اخف دم ممكن تقابله في حياتك , وإن كلامه بقى قانون في دولة قلبك , معتقداته وآرائه منارة نور وماينفعش يبقى فيه حد بيقول كلام أحسن من اللى هو بيقوله , تحس إنك لما تبص في عيونه إنك كل الدنيا دي في إيدك , تحس إنه لما بيضحك الدنيا كلها بتضحك والشمس طلعت والدنيا بقت جميلة جداً .
واهٍ ثم أهٍ بأة لو كشر ولا زعل تلتقي الدنيا بقت ضلمة أوي وانك خلاص قلبك ده بجد والله يا جماعة خلااااااص هينفجر ومش بعيد تلتقي عيونك عملت سحابة وتلتقي غيمة معدية وخلتها تمطر جوا عيونك وتفضل كدهون لحد هو ما يبقى كويس ويرجع فرحان تاني ترجع فرحتك ليك.
يعني حبوبك ده بيبقى دنيا تانية غير الدنيا اللى انت بتشوفها مع أصحابك واهلك وزمايلك وشغلك , حد بجد بيمتلك تقريباً مشاعرك كلها مودك بيبقى في إيده هو , وبعدين انت مش بتبقى شايف حد تاني غيره في الدنيا كلها , بتحس إنه اخدك من أصحابك ومن الدنيا ومن الناس ومن نفسك اه والله اخدك من نفسك انت مش شايف نفسك انت شايفه هو بس.
بس تخيل بأة وانت في وسط كل مشاعرك الجميلة دى اللى انت حاسس بيها وبسببها انت طاير من الفرحة , صحيت فجأة على أن الحد ده انت بتديله حاجة مش ينفع تديهاله أو بمعني أصح بتدى حاجة مش في مكانها الصح لأن الحد ده مش حاجة تخصك مش حاجة ملكك انت .
أو ممكن يكون الحد ده مش ينفع اساسا إنك تقربله وبعدين تيجي بأة بعد المشاعر دى كلها والحاجات اللى رايحة منك لحبوبك ده تصحي فجأة على إنه مش ينفع والكلام ده أكبر غلط انت عامله في حياتك , وإن مشاعرك دى كلها المفروض تقومها تاني وتبدأ ترجعها زى ما كانت لإنها المفروض والطبيعي إنها تروح لمكان صح .
وترجع تبدأ رحلة ترميم في قلبك اللى انكسر أو حصل فيه شرخ من الزلزال اللى حصل جواك بس برضة انت بتقنع نفسك انك خلاص هتسيب حبوبك (أو اللى كان حبوبك) بس بتقول بس مش بتعرف , أو الموضوع بيبقى صعب جدا عليك , وبعدين تبقى خايف بأة إن يكون حد شافك وانت بتحب (اللى كان حبوبك) أو اخد باله منك وانت عاشق للشخص ده فعلاً انت بتبقى عاشق مش بتحب بس , وبعدين نرجع تاااااااااااني نحاول نرمم بأة في الحاجات اللى طالها شرخ او كسر جوانا , بس بنفضل فترة طويلة جداً نحاول نرجعها زى ما كانت .
بس يا اخواننا الموضوع بيتاخد على مهله خالص ما ينفعش تبقى انت جواك كل المشاعر اللى انا قولتها دى وفجأة تبقى عايز ترجع كل حاجة مكانها دة حلم , أصل مش كل حاجة انت عايزها بتحصل بسرعة أوي كده .
ده لو كان كده كانت الدنيا بقت حاجة تانية خالص , وبعدين انت مابتحبش بسرعة اوي عشان ترجع كل حاجة مكانها بسرعة اوي كده .
بس تأكد ممكن لو حبوبك ده إنسان كويس هيقومك وهيفضل معاك لحد ما تخف وياخدك لمكان صح .
أصل فيه ناس يا جماعة تعقد وتزود هم انك انت تبعد عن الحب اللى ظهرلك فجأة من حيث لا تعلم ولا تدري , يفضل يقولك ابعد عني ابعد عني , وانت اساسا قربت منه من غير قصد منك , قال يعني انت حبيته بمزاجك وانت مبسوط من الوضع الغلط ده .
وانت الكلام ده اساسا بجد خارج عن إرادتك انت مش قاصد إنك تحبه , انت التقيت حد كويس ولقيت برضه مشاعرك كلها رحت للشخص ده قلبك وعيونك واهتمامك واحساسيسك ومشاعرك وروحك وكلامك ولو غاب شوية تحس إنك ضايع مش مركز مش مجمع كلمتين على بعض بالظبط زى البيبي اللى مامته سابته ومشيت وهو يا حرام لسة مش يعرف حد في الدنيا غيرها هي بس اللى معاها مفاتيحه وهي اللى تعرف تفرحه , ولو جبتله اى حد تاني مش هينفع برضه عشان المفاتيح مش معاه , وبعدين لما بيرجع حبوبك بأة الدنيا كلها بتضحك بيبقى نفسك تتنطط ترقص تغني تقول للدنيا كلها إن الحاجة اللى بتفرحك رجعتلك .
على فكرة الواحد أساسا بيتعذب جداً بس العذاب ده بيبقى مبسوط منه جدا مبسوط إن فيه حد صحي الاحاسيس دى فجأة اللى انت ماكنتش متخيل إنها جواك أساسا وبجد بيتبقى فرحان بحبوبك ده اللى عمل زى مايكون حد بيحفر من غير ما يقصد وطلع أحلى مشاعر جواك , والمشاعر دي كلها اخدها هو لأنه كان أول حد اكتشفها , بس على فكرة لما بنيجي نرجع تاني زى ما كنا أكيد بنقع في السكة مرة واتنين أصل ده لازم يحصل وبعدين بجد لو انت خفيت من الحب ده بسرعة أوي كدهون تبقى أساسا مش كنت بتحب.
خلاص التجربة خلصت وخرجنا برة
بس أنت حتى لما بتنهي التجربة دى بيحصل حاجة من كذا حاجة , وده لازم يحصل .
أول حاجة : بتكسب إنك بجد عيشت لحظات حلوة جدا كنت بتحب وحسيت بمشاعرك اللى انت كنت نسيتها وحطيتها في الفريجيدير فضلت فترة مبسوط جداً حاسس إن فيه حد ملا المكان الفاضي والفراغ اللى كان في مشاعرك .
الحاجة التانية : إنك لو حظك الحلو وقعك في حبوب يحتويك بجد ويخرجك من الموضوع بأقل خسائر ممكنة على الأقل مش هيحسسك بإهانة أو بإنك مجروح وخارج من تجربة فاشلة وهتلاقية بيقدر بجد إن الموضوع خارج عن إرادتك ومشاعرك دى راحت لحبوبك ده من غير قصد , وهتلاقيه بيعاملك بكل طيبة ورقة لحد ما تبقى كويس وتخف .
انا عايزة أقول حاجة : لو بجد حبوبك ده كان بيعاملك كدهون حتي لو الموضوع فوركيشن مش ينفع بجد تخسر حد زي ده لأنه إنسان وشخص قليل أوي لو التقيت زيه فبجد يبقى لازم تحافظ عليه كصديق لأن حد زى (اللى كان حبوبك ) ده حرام تخسرة ولو خسرته هتخسر كتيييييييييييييييير اوي , وفي الآخر حتي لو ما اخدتش حبيب اديك اخدت صديق وحد بجد هتلتقيه معاك على طول , وعلاقتك بيه في الوقت ده هتبقى أحسن بكتييييييييير وهتفضل فترة طويلة ومش بعيد تبقى طول العمر , عشان حد زى الشخص ده حرام إنك تفارقه .
و الحالة التالتة : دي هم وحدها و هتزود هم فراقك لحبوبك وتخليه همين تلاتة اربعة وده لو الأخ اللى انت كنت بتحبه ده حد خنيق ومش مستوعب إنه مش بإيدك إنك حبيته هتلتقيه بأة يفضل يزن على دماغك ويقولك كده ماينفعش ابعد عني سيبني, واللى يشوف كده يقول إنك ماسك فيه , وتلتقيه تجنبك من غير مناسبة وبيعاملك معاملة وش , ومتعمد إنه يهينك ويحسسك إن مشاعرك دى حاجة كدهون زى (جواز عتريس من فؤادة بااااااااااااااااااااااطل – باااااااااااااااااااااااااطل – باااااااااااااااااااااااااااطل) وتغلب تفهم فيه وهو أساسا شكله مابيفهمش.
والمصيبة الكبيرة إنك هتلاقيه عاملك ضغط نفسي وعصبي أكتر من مشكلتك نفسها وإنه هو المشكلة , مش البعد عنه هو المشكلة .
وفي الحالة دي هيص يا عم انت بسبب غبائه ومعاملتة المتخلفة هتلتقي نفسك أساسا كرهته وبعدين بأة هتحس إنه حد مش فيه جواه قلب ولا رحمة , حاجة كدهون عاملة زى كفار قريش ولا أبا الغضب وهتلتقي نفسك بعدت عنه والسبب هو زى ما قربك ليه بيبعدك عنه برضه , وبعدين بتلتقي نفسك اساسا مش عايز تشوفه بجد بتحس إنه حد عنيف متخلف , هو في سنة الفين وحاجة ودماغة من أيام جدتي وجدتك حد مخه لابس طربوش وماسك منشة بس هو شكله من برة يديك إنه عايش في سنة 2000 وشوية , لبس بأة يا عمنا وعلى رأى المثل (لبس البوصة تبقى عروسة ) بس من جوا بأة بينطبق عليه مثل (إيش يعمل التعليم في المخ المتخلف ) تحس إنه عايش من أيام ( سعد سعد تحيا سعد) وبعدين تحس بجد انك اخدت فيه بمبه , عادي يا جماعة (هو ماحدش اخد بمبة في حياته يا اخواننا) , وفي كل الحالات هتلتقي نفسك خرجت من التجربة الحمد لله .
بس انا اتمني إنك لما تخرج تخرج بصديق وبمشاعر جميلة عشتها وعم ابو لهب ده ربنا مايوقع حد فيكم فيه وربنا يستر , وحمد الله على السلامة من التجربة اللى هتلتقيها سعيدة شوية وحزينة شوية , بس اهم حاجة انك رجعت واربط الأحزمة وامتنع عن التدخين عشان هترجع لدنيتك وحياتك وأصحابك وشغلك من جديد , وكمان كسبت حد جديد , الف مبروك (جالك صديق جديد) هيص يا عم .
The end
الأحد أغسطس 03, 2008 10:15 am
